Kryetari i AAK-së, Ramush Haradinaj ka deklaruar se Serbia në kuadër të luftës speciale kundër vendit tonë, ka riaktualizuar përndjekjen e qytetarëve të Kosovës që kanë qenë pjesë e çlirimit të vendit, kryesisht ish pjesëtarë të UÇK-së.

Ai tha se Serbia ka arritur t’i shtrijë tentakulat e saj në disa vende të rajonit si dhe po i shfrytëzon përparësitë e veta si anëtare e Interpol për ndjekje ligjore në vendet jashtë Kosovës, transmeton lajmi.net.

Haradinaj u bëri thirrje kosovarëve që të kenë kujdes gjatë udhëtimeve.

Ditë më parë është bërë e ditur se Serbia ka dorëzuar një listë të gjatë me emra dhe të dhëna për ish-pjesëtarë të UÇK-së në Maqedoninë e Veriut në mënyrë që kurdo që kalojnë në këtë kufi ata të arrestohen e ndalohen në kuadër të bashkëpunimit me Interpol.

Postimi i plotë:

Të nderuar bashkëluftëtarë,

Serbia në kuadër të luftës speciale kundër vendit tonë, ka riaktualizuar përndjekjen e qytetarëve të Kosovës që kanë qenë pjesë e çlirimit të vendit, kryesisht ish pjesëtarë të UÇK-së.

Fatkeqësisht, Serbia ka arritur t’i shtrijë tentakulat e saj edhe në disa vende të rajonit si dhe po i shfrytëzon përparësitë e veta si anëtare e Interpol dhe organizatave të tjera ndërkombëtare, për ndjekje ligjore në vendet jashtë Kosovës. Një model i tillë ishte aplikuar me rastin e ndalimit tim në Francë dhe Slloveni.

Prandaj ju këshilloj që të bëni kujdes gjatë udhëtimeve tuaja./Lajmi.net/