Sot janë diplomuar gjenerata e re e oficerëve të Forcës së Sigurisë së Kosovës. Në këtë ceremoni kadetët përfunduan studimet katërvjeçare në Akademinë Ushtarake.

Gazetarja e lajmi.net, Linditë Berisha, ka përcjellur nga afër ceremoninë zyrtare të diplomimit të oficerëve të rinj të FSK-së.

Me hyrje madhështore, dhe fjalime të forta u hap ceremonia e diplomimit të oficerëve të rinj të FSK-së.

Në fjalën hyrëse një oficere e FSK-së pati një fjalim motivues për oficerët e rinj.

“Mesazhi im apo porosia ime e dytë për kadetët e nderuar është: Bëhuni versioni më i mirë vetes suaj në momentet më të vështira”- tha oficerja e FSK-së.

Në mes lotësh gëzimi gjyshërit dhe gjyshet u ndjenë të gëzuar dhe krenarë me nipërit dhe mbesat e tyre në rastin e diplomimit të oficerëve të rinj të FSK-së.

“Shyqyr që kemi ardhur në këtë ditë tek ushtria jonë, jam shumë e gëzuar. Jam gëzuar shumë për nipin tim… për gjithë ushtrinë jam e gëzuar”- tha e moshuara për nipin e saj.

Ndërsa theksohet se brenda kësaj ceremonie diplomoi edhe femra e vetme si oficere e FSK-së, Fitore Shyti. /Lajmi.net/