Atleti nga Kosova, Erzen Zyberaj e përmbylli me sukses misionin e tij, vrapimin nga Prishtina në Tiranë, për nder të 111 vjetorit të Pavarësisë së Shqipërisë.

Zyberaj u nis një ditë më parë (e hënë) nga sheshi “Skënderbeu” në Prishtinë dhe mbërriti në sheshin “Skënderbeu” në Tiranë sot gjatë ditës.

Pasi kaloi misionin me shumë sukses, Zyberaj u shpreh i lumtur për respektin që i dha Bashkia e Tiranës, ndërsa foli edhe për sfidat me të cilat u përball ai gjatë rrugëtimit prej 260 kilometrave.

“Jam shumë i lumtur për respektin nga Bashkia e Tiranës. Normalisht është sfiduese shumë për shkak të kushteve klimatike që ndeshëm, por ne ia arritëm”- tha Zyberaj për RTSH.

Zyberaj ka treguar edhe nga i erdhi ideja për këtë vrapim.

“Ideja ka qenë eë para disa viteve. Tashmë jam i njohur për vrapimet në distancet e gjata që bëj. Ka qenë një dëshirë që të sfidoj veten edhe në një distancë të tillë”- shtoi ai./Lajmi.net/