Të paktën 22 njerëz u vranë dhe “shumë e shumë të tjerë” u plagosën nga të shtënat në qytetin Lewiston, Maine në ShBA të mërkurën në mbrëmje, njoftuan zyrtarët e qytetit, teksa spitalet lokale u mbushën me viktima.

Këshilltari i qytetit Robert McCarthy tha për CNN se numri i të vdekurve ishte rritur në 22 nga të shtënat që ndodhën në një qendër bowlingu dhe gjithashtu të paktën një vend tjetër, një restorant dhe bar lokal, sipas mediave, transmeton lajmi.net.

“Ajo çka e kam kuptuar unë është se ata kanë një identifikim paraprak të sulmuesit në sallën e bowlingut. Janë konfirmuar 22 të vdekur, shumë e shumë të tjerë të plagosur,” tha McCarthy.

Automjetet e shpëtimit nxituan nga rrethina qendrore e Maine për t’u kujdesur për të plagosurit, tha McCarthy, dhe dy spitalet në Lewiston “kanë thirrur çdo anëtar të stafit që ishte jashtë detyrës për t’u marrë me këtë”.

Policia lokale postoi një foto të sulmuesit në Facebook duke mbajtur atë që dukej të ishte një armë gjysmë automatike brenda sallës së bowlingut.

Ata më vonë lëshuan një njoftim për 40-vjeçarin Robert Card, duke thënë se i dyshuari për të shtënat masive “duhet të konsiderohet i armatosur dhe i rrezikshëm”.

“Ju lutemi kontaktoni organet e zbatimit të ligjit nëse jeni në dijeni për vendndodhjen e tij”.

Policia publikoi gjithashtu një foto të një fuoristrade të bardhë dhe kërkoi ndihmën e publikut për identifikimin e automjetit, duke thënë se parakolpi i tij i përparmë mund të jetë lyer me ngjyrë të zezë.

“Ne po inkurajojmë të gjitha bizneset që të mbyllen ndërkohë që ne hetojmë. I dyshuari është ende i lirë.”, kanë shkruar nga Departamenti i Sherifit.

Guvernatorja e Maine, Janet Mills tha se ajo ishte “në dijeni dhe ishte informuar për situatën aktive të gjuajtjes në Lewiston”.

CNN raportoi se të paktën 50 deri në 60 persona u plagosën në incidente, duke cituar burime të shumta të zbatimit të ligjit, por tha se ishte e paqartë se sa prej plagëve ishin rezultat i të shtënave me armë. /lajmi.net