Zyrtarët lokalë në Rusi thanë se të paktën 43 persona janë plagosur nga një shpërthim në një fabrikë optike në qytetin Sergiyev Posad, rreth 70 kilometra larg Moskës, më 9 gusht.

Gjashtë nga të plagosurit ndodhen nën përkujdesje intensive për shkak të djegieve të rënda dhe lëndimeve në kokë, sipas administratës së qytetit. Disa prej 43 personave të pranuar në një spital rajonal kanë marrë lëndime nga copëzat e metalit.

Kanali i pavarur në Telegram, Baza, shpërndau një video e cila shfaq një re të madhe tymi dhe e identifikoi ndërtesën e goditur si Fabrika Optike dhe Mekanike e Zagorskut, e cila prodhon mjete për shikim gjatë natës dhe mjete tjera optike për ushtrinë.

Zyrtarët rusë e konfirmuar këtë më vonë.

Agjencia e lajmeve e Rusisë, TASS, i citoi shërbimet emergjente ta kenë mohuar lajmin në rrjetet sociale se shkaktari i shpërthimit ishte një sulm me dron.

Ky spekulim u nxit nga sulmet me dronë në Moskë muajt e fundit, për të cilat Moska e ka fajësuar Kievin, si dhe nga raportimet ruse se i kishte parandaluar dy sulme të reja me dronë afër Moskës gjatë natës së 8 gushtit.

TASS raportoi se shpërthimi ndodhi në vendin ku po mbaheshin mjetet piroteknike dhe se u shkatërrua një depo e madhe.

Një zjarr i papritur e kishte dëmtuar të njëjtën fabrikë Zagorsk në qershor 2022. /REL/