Marshi i Max Verstappen drejt titullit të kampionit në Formula 1 këtë edicion është performanca më dominuese nga një pilot, së paku prej atyre që ka parë shefi i Red Bull, Christian Horner.

Piloti i skuadrës së Red Bull, Max Verstappen ka siguruar titullin e kampionit për sezonin 2022 në Formula 1.

Madje, holandezi ka vendosur edhe një rekord, të cilin mund ta shtyjë edhe më shumë. Ai ka më së shumti gara të fituara brenda një sezoni, kurse para vetes ka 2 gara tjera që mund t’i shtojë në rekord.

Lidhur me paraqitjen e tashmë dy herë kampionit botëror, shefi i Red Bull, Christian Horner thotë se është paraqitja më dominuese që ka parë ndonjëherë.

“Ka pasur vite dominimi me Mercedes, por unë mendoj se si shofer individual, ndoshta po. Ai ka fituar më së shumti çmime të mëdha në një vit, brenda 22 garave”, ka thënë Horner, i pyetur për krahasimin me Hamilton, përcjell lajmi.net.

“Përveç kësaj, ai ka fituar dy gara në sprint dhe nuk i ka fituar të gjitha nga pozita pole. Atij i është dashur të luftojë dhe të garojë për shumë nga ato fitore”, shtoi ai.

“Unë mendoj se kur shikojmë prapa në fund të vitit, është një vit absolutisht i jashtëzakonshëm që Max ka drejtuar. Ai nuk e ka vënë rrotën gabim. Ai ka qenë perfekt gjatë gjithë sezonit. Është e pabesueshme niveli i konsistencës që ai ka mundur të arrijë”, ishin fjalët e shefit të Red Bull.

Verstappen do të synojë fitore edhe në Brazil e Abu Dhabi, për të mbyllur në mënyrë perfekte sezonin 2022 në F1. /Lajmi.net/