Milani po kërkon të vazhdojë bashkëpunimin me Stefano Piolin.

Stefano Pioli ka arritur rezultate të pabesueshme me Milanin dhe klubi thuhet se është i përgatitur për të aktivizuar klauzolën e zgjatjes së kontratës së tij, përcjell lajmi.net.

Trajneri italian mori drejtimin e kuqezinjve në tetor 2019 pas shkarkimit të Marco Giampaolo dhe ka udhëhequr ekipin në 152 ndeshje në të gjitha garat që atëherë.

Pioli ka qenë një figurë kyçe në rikthimin e Milanit në majat e futbollit italian dhe i udhëhoqi ata drejt ‘Scudettos’ së tyre të parë në një dekadë sezonin e kaluar, duke përfunduar dy pikë përpara rivalëve të qytetit Inter.

Siç theksohet nga ‘TMW’, kontrata aktuale e Piolit me Milanin skadon në fund të këtij sezoni, por ekziston një klauzolë e zgjatjes njëvjeçare, e cila do të zgjasë marrëveshjen e tij deri në vitin 2024 dhe do të rrisë pak pagën e tij.

Klubi është jashtëzakonisht i kënaqur me punën e tij në stolin e ‘kuqezinjve’ dhe po përgatitet të aktivizojë klauzolën, duke konfirmuar të ardhmen e tij me klubin./Lajmi.net/