Shtrimet në spital për shkak të COVID-19 po shënojnë rritje në pjesë jugore të Shteteve të Bashkuara, shkruan VOA.

Disa shtete po regjistrojnë shifra rekorde të pacientëve, ndërsa vendi po përballet me një valë të re të infeksioneve me variantin Delta të koronavirusit, transmeton lajmi.net.

Senatori amerikan Lindsey Graham filloi karantinën 10 ditore pasi doli pozitiv në testin për koronavirus.

Republikani nga Karolina e Jugut është senatori i parë që zbulon se u infektua pas vaksinimit.

66 vjeçari Graham, tha në një deklaratë se të shtunën vërejti simptoma të një gripi, ndërsa të hënën u vizitua tek mjeku.

Senatori ishte vaksinuar në dhjetor. Infektimi i tij vjen pas udhëzimeve të reja nga Qendra për Kontrollin dhe Parandalimin e Sëmundjeve, sipas të cilave edhe ata që janë vaksinuar plotësisht duhet të mbajnë maska në mjedise të mbyllura në zonat më të prekura.

Ndërkohë autoritetet në Luiziana, Florida dhe Arkansa po raportojnë rritje të shtrimeve në spital që kur varianti Delta u bë dominues në Shtetet e Bashkuara.

Koordinatori i Shtëpisë së Bardhë për COVID-19, Jeff Zients, tha se rastet me koronavirus po shënojnë rritje, sidomos në zonat me shkallë të ulët vaksinimi.

Ai shtoi se numri i përgjithshëm i njerëzve që po vaksinohen është në rritje.

“Vetëm në shtatë ditët e fundit, 3 milionë amerikanë morën dozën e parë. Kjo është shifra më e lartë shtatë ditore që nga 4 korriku. Tani 70 për qind e të rriturve janë vaksinuar me një dozë, duke përfshirë 90 për qind të të moshuarve. Këto janë zhvillime shumë pozitive në luftën tonë kundër virusit. Është me rëndësi të vihet në dukje se në vendet me më shumë raste, është dyfishuar shkalla e vaksinimeve”, tha zoti Zients.

Rritja e rasteve të reja me koronavirus bëri që autoritetet në vendet më të goditura të rivendosin masën për mbajtjen e maskave dhe e bënë të detyrueshme paraqitjen e dëshmisë së vaksinës në vendin e punës.

Kryebashkiaku i Denverit në shtetin e Kolorados, Michael Hancock, njoftoi të hënën se qyteti do t’i detyrojë të gjithë punonjësit e bashkisë, përfshirë ata të sektorit privat, që të vaksinohet kundër virusit deri në fund të shtatorit.

Shtetet e Nju Xhersit, Nju Jorkut dhe Kalifornisë gjithashtu po e bëjnë të detyrueshëm vaksinimin për punonjësit civilë.

Javën që shkoi Presidenti Joe Biden njoftoi se miliona punonjës federalë dhe ata që punojnë me kontraktatë për qeverinë, duhet të tregojnë provën e vaksinës, ose të kryejnë vazhdimisht teste për COVID-19, para se të futen në mjediset e punës. /Lajmi.net/