Çekia është shteti i rradhës që e ka marrë seriozisht në konsideratë çnjohjen e Kosovës, shkruan lajmi.net.

Gjithçka nisi me deklaratat e presidentit çek, Milos Zeman në Beograd, që më pas u përcollën me reagime e kundërshtime të ashpra nga kryeministri e ministri i Jashtëm.

Nga ministria e Jashtme e Kosovës po thonë se kundërshtimet e bëra nga ministri i Jashtëm çek, e mbyllin çështjen e çnjohjes së mundshme të pavarësisë së Kosovës.

Liridon Llapashtica, këshilltar i ministrit të Jashtëm, Behgjet Pacolli për lajmi.net thotë se deklaratat e ministrit Tomas Petriçek, i japin vulë qëndrimit të Pragës karshi pavarësisë së Kosovës.

“Deklaratat e ministrit Petriçek mendoj se e mbyllin këtë çështje. Pra kur një ministër i Jashtëm thotë se konstatimet rreth çnjohjes nuk qëndrojnë, kjo çështje është e kryer”, thotë ai.

Llapashtica përmend edhe takimet e ambasadorit të Kosovës në Çeki, Arbër Vllahiu me ministrin e Jashtëm të Çekisë, që sipas tij tregojnë raportet e shkëlqyera mes dy shteteve.

Mirëpo këto raporte mund të ftohen nga momenti në moment, varësisht nga veprimet e shtetit çek karshi çnjohjes së Kosovës.

Presidenti e kryeministri i këtij shteti patën mbrëmë një takim, nga ku dolën me vendimin që për Kosovën të vendoset në një takim koordinues të akterëve të diplomacisë.

Lexo edhe:

Kjo është arsyeja pse presidenti çek i dha ‘zemër’ Serbisë me deklarata kundër Kosovës

Lidhur me këto zhvillime, lajmi.net ka kontaktuar me vet ambasadorin e Kosovës në Çeki, Arbër Vllahiun.

I njëjti nuk ka pranuar të përgjigjet në pyetjen nëse ka pasur kontakte me zyrtarët e shtetit çek, dhe nëse ka gjasa reale që tërheqja e njohjes të ndodhë.

“Ju lutëm që për të gjitha këto çështje të drejtoheni tek ministria e Punëve të Jashtme”, ka thënë Vllahiu duke mos dashur të përgjigjet.

Sidoqoftë, tendencat e presidentit çek po hasin në rezistencë të madhe nga ministria e Jashtme e Çekisë.

Ministri i Jashtëm, Tomas Petriçek, tha sot se shteti i tij nuk ka arsye ta tërheqë njohjen e Kosovës.

Sipas tij, politika e jashtme duhet të jetë e qëndrueshme dhe e arsyeshme.

Gjithçka sa i përket kësaj çështje pritet të zgjidhet në tetor të këtij viti, në takimin e ftuar nga kryeministri e presidenti. /Lajmi.net/

Lexo po ashtu: 

“S’e tërheqim njohjen e Kosovës”, ministri i Jashtëm çek i përgjigjet shpejtë kryeministrit e presidentit