Ministri Hasani i ka njoftuar qytetarët se sot ka kaluar në lexim të parë në Kuvendin e Kosovës Projektligji për mbrojtjen e konsumatorit, që është bërë në harmonizim me legjislacionin e BE-së, përcjell Klan Kosova.

“Sot dua të jap një lajm të mirë për qytetarët e Kosovës se sapo e kaluam Projektligjin për mbrojtjen e konsumatorëve, ka ekzistuar një ligj, por e kemi bërë një plotësim ndryshim, sepse ka pasur disa defekte gjatë rrugës së implementimit, e kemi bërë në përputhje të plotë me legjislacionin e BE-së, sepse sot është 15 marsi, Dita Ndërkombëtare e Konsumatorit”, ka thënë Hasani njofton MTI.

“Ky ligj që e kemi miratuar sot në leximin e parë, mbron të drejtën e konsumatorit dhe është shumë i favorshëm, për shkak se është komplet i harmonizuar me ligjet e BE-së, që do të gjejë zbatim edhe në terren. Po ashtu jemi duke bërë fushata të vazhdueshme për vetëdijesimin e konsumatorëve, të tregojmë se çdo qytetarë ka të drejtë ankuese”, ka thënë Hasani.

Ministri ka thënë se në çdo ditë kryejnë inspektime dhe aksione në terren.

“Kemi inspektime e aksione, shqiptojmë gjoba, por neve na duhet një informacion shtesë, e këtë mund ta bëjmë vetëm me bashkëpunim me konsumatorët, mos të kemi vetëm inspektime rutinë. Kemi pasur një lansim në fund të vitit 2017 që i kemi informuar qytetarët me mesazhe dhe ka pasur ankesa ku ka ndërhyrë inspektorati, si dhe janë asgjësuar qindra mijëra euro mallra që kemi hasur në ndryshim të çmimeve”, ka thënë Hasani.

Fushata informuese do të vazhdojë edhe ditëve tjera, ku do të përfshihen shtatë qendrat kryesore të Kosovës: Prishtina, Ferizaj, Gjilani, Mitrovica, Peja, Gjakova dhe Prizreni.