Ky veprim vjen pasi Gjakova hapi tender për ndërtimin e bustit për komunistin Fadil Hoxha.

Fadil Nura, ushtrues detyre i kryetarit të komunës së Skenderajt, ka njoftuar se kjo komunë shumë shpejtë do të ndërtoj shtatoren e heroit kombëtar anti-komunist Shaban Polluzha.

Nura përmes rrjetit social Facebook ka thënë se kjo është një kundërpërgjigje ndaj komunave, që po u ndërtojnë shtatore atyre që sipas tij i kishin duart me gjakun “e paster të Shabanit” duke iu referuar kështu komunës së Gjakovës e cila do të ndërtoj shtatoren e ish-liderit komunist Fadil Hoxha.

Kjo shtatore sipas tij, do të zë vend në qendër të Skenderajt në hapësirën e parkut që bartë të njëjtin emër, pasi thotë se Drenica “mbetet e varfër për derisa në gjirin e vetë i mungon biri i saj”, shkruan Nura.

“Kjo jo për t`i bërë karshillëk apo oponencë Komunave që i ngrehin shtatore, pikërisht atyre që i kishin duart e gjakosura me gjakun e pastër të Shabanit, Mehmetit e shumë e shumë bashkëluftëtarëve tjerë të Drenicës e mbarë Kosovës”, shkruan Nura.