“Ky investim, që ka të bëjë me shtrirjen e rrjetit 3G dhe 4G, e kthen PTK/VALA-n në njërën prej kompanive më moderne dhe më inovative në të gjithë Ballkanin sa i përket platformës së internetit të shpejtë”, thuhet në njoftimin për media.

Gjithashtu, investimi si i tillë ka qenë njëri prej më komplekseve që ka realizuar PTK gjatë viteve të fundit, duke përmbyllur ciklin e kompanisë drejt modernizimit dhe avansimit.

“Sot ia prezantuam ministrit njërin prej investimeve më serioze që ka realizuar PTK. Mund t’iu njoftojmë se ky investim gjigant do të përfundojë më 28 prill. Mund të them se me përfundimin e këtij projekti, PTK jo vetëm në Kosovë, por edhe në të gjithë regjionin do të jetë lider sa i përket teknologjisë”, tha drejtori menaxhues i PTK-së, Agron Mustafa

Ky projekt i internetit të shpejtë 3G dhe 4G, pritet që të ketë mbulueshmëri gati në të gjithë territorin e banuar të vendit ku do të mund të shërbehen të gjithë konsumatorët.

“Erdhëm sot këtu për t’u njohur me të tashmen dhe të ardhmen e kompanisë më të madhe në vend, duke marrë sinjale të qarta dhe pozitive nga Bordi dhe menaxhmenti i saj, lidhur me fazat e zhvillimit. Qeveria do të ofrojë përkrahje strategjike në avancimin teknik dhe profesional të kompanisë”, bëri të ditur ministri për Zhvillim Ekonomik, Blerand Stavileci.

Implementimi i këtij projektit vjen pasi PTK kalojë në dy procese komplekse dhe të dështuara të privatizimit, të cilat bën që kompania të mbetet mbrapa sa i përket teknologjisë dhe rënies së të hyrave.