Kryeministri i ri i Kosovës, Isa Mustafa do të përpiqet, siç transmeton gazeta serbe “Novosti”, ta imponojë këtë si njërën nga temat kryesore në vazhdimin e dialogut politik me Serbinë, kur më 8 e 9 shkurt do të takohet me kryeministrin e Serbisë, Aleksandar Vuçiq.

Edhe Brukseli arritjen e zgjidhjes për urën e ka vënë si njërin nga kushtet për hapjen e kapitujve të parë negociues Serbi-BE, transmeton Koha.net njoftimin e kësaj gazete.

Nga ana tjetër, siç njofton gazeta e Beogradit, Serbia do të insistojë në qëndrimin se ura për serbët e veriut, në radhë të parë, është çështje sigurie dhe se asgjë në urë dhe përreth saj nuk bën të preket përderisa për të mos merren vesh prefekti i veriut dhe ai i jugut të qytetit, përkatësisht Goran Rakiq dhe Agim Bahtiri.

Përderisa Prishtina në vazhdim të dialogut do të insistojë për zgjidhjen e çështjes së “Parkut të Paqes”, Beogradi si temë kryesore do ta imponojë formimin e Asociacionit të komunave serbe.

Siç ka thënë për “Novosti” Aleksadar Jabllanoviq, ministër për Kthim e Komunitete në Qeverinë e Kosovës, Asociacioni do të formohet brenda pesë muajve të ardhshëm, dhe ai do të njihet në sistemin e Serbisë, por edhe në atë të Kosovës dhe do të ketë buxhet të veçantë.

Prefekti i Mitrovicës Veriore, Goran Rakiq, ka thënë për këtë gazetë të Beogradit se çdo veprim i njëanshëm rreth heqjes së “Parkut të Paqes” do të shkaktonte tensione të reja dhe se kjo nuk do të ishte në interesin e askujt.