(E plotësuar)

Në bazë të njoftimeve se Policia e Kosovës ka bastisur zyrtarët e Komunës së Klinës nga radhët e AAK-së,  Aleanca për Ardhmërinë e Kosovës e liroi Enver Berishën nga të gjitha funksionet partiake, deri në përfundimin e hetimeve, thuhet në kumtesën e kësaj partie.

____________________________________________________________________________

Bastisen zyra dhe shtëpia e nënkryetarit të Klines

Të hënën në mëngjes policia kreu bastisje në “Shtëpinë e Bardhë” – selia e Komunës së Klinës. Ata bastisën zyrën dhe më vonë edhe shtëpinë e nënkryetarit të Komunës, Enver Berisha.

Lajmi për këtë bastisje është konfirmuar për Express nga Prokuroria Speciale e Kosovës, duke mos dhënë më shumë detaje për shkaqet e bastisjes.

“Bastisja është kryer me urdhër të prokurorit special”, ka thënë zëdhënësi i Prokurorisë, Astrit Kolaj.

Gazeta ka provuar të kontaktojë Enver Berishën, por ai nuk i është përgjigjur thirrjeve të gazetës. Ndërsa nga Komuna e Klinës nuk kanë dashur të komentojnë këtë bastisje.

Enver Berisha është kryetar i degës së AAK-së në Klinë. Pozita e nënkryetarit të Klinës i kishte takuar si pjesë e koalicionit me PDK-në në këtë komunë.