Ky informacion që ka filluar të qarkullojë ditëve të fundit nëpër Ferizaj, si duket po del të jetë i vërtetë ngase një informacion të tillë e kanë konfirmuar të dielën edhe drejtues të Sindikatës së kësaj fabrike, të cilët njëherësh edhe e kanë kundërshtuar këtë veprim të menaxhmentit drejtues.

Kryetari i kësaj sindikate, Ali Azemi e ka konfirmuar këtë lajm për Kosovapress, duke thënë se në bazës të informacioneve që ka kjo sindikatë, pjesa më e madhe e makinave të repartit të ri tashmë është duke u çmontuar dhe është duke u bartur për në Maqedoni.

Azemi ka thënë se këtë veprim të menaxhmetit e kanë konfirmuar edhe punëtorë që janë ende në marrëdhënie pune aty.

“Në bazë të informatave që ne i kemi, e që kanë ardhur nga punëtorët që punojnë aty, është e vërtetë se komplet makineria e repartit të ri të fabrikës është duke u çmontuar dhe është duke u bartur për në Maqedoni. Kemi informacion se menaxhmenti ka angazhuar rreth 20 maune që po e kryejnë transportin, edhe atë gjatë natës”, ka thënë Azemi.

Sindikata ka paralajmëruar që gjatë ditëve në vijim të protestojë publikisht për këtë veprim të menaxhmentit të fabrikës, i cili, sipas drejtuesve të sindikatës, nuk e ka të drejtën ta bëjë këtë ngase fabrika më parë duhet të shkojë në falimentim e vetëm më pastaj të nisin procedurat e shitjes.

“Kjo është në kundërshtim të plotë me rregullat. Fabrika është privatizuar me spin-off special dhe nuk ka kaluar nëpër një proces të falimentimit dhe në këto rrethana nuk guxon që asnjë makinë e saj të shitet” ka shtuar Azemi.

Të kontaktuar nga Kosovapressi, edhe disa punëtorë të kësaj fabrike në kushte anonimiteti kanë lënë të kuptojnë se diçka është duke ndodhur me makinerinë e repartit të ri. Ata janë shprehur se kjo nuk është diçka e re dhe i tërë opinioni ferizajas di për këtë veprim të menaxhmentit.

Aktualisht, në këtë fabrikë, e cila dikur ka qenë gjigant jo vetëm i Ferizajt por edhe i Kosovës dhe rajonit, janë të punësuar më pak se 100 punëtorë.