Deri tash nga varreza masive në Rudnicë janë nxjerrë mbetjet mortore të 37 personave.

Si njofton Blic i Beogradit, këtë lokalitet të mërkurën e kanë vizituar edhe përfaqësues të Kombeve të Bashkuara, të cilët kanë ardhur të verifikojnë se si po bëhet hapja e varrezës dhe nxjerrja e mbetjeve mortore.

Sipas kryetarit të Komisionit qeveritar serb për persona të zhdukur, Velko Odaloviq, deri tash janë nxjerr mbetjet e 37 personave.

“Nxjerrja e mbetjeve po shkon në mënyrën më të mire, ndërsa së shpejti do të duhej të fillojë gërmimi dhe hetimi I një lokacioni të afërm, ku dyshohet se po ashtu janë varrosur shqiptarët”, tha ai.

Ndihmësi i Sekretarit të Përgjithshëm të Kombeve të Bashkuara për operacione paqësore, Edmond Mulet vlerësoi se patologët dhe punëtorët e tjerë në Rudnicë po punojnë në mënyrë profesionale.  

“Puna po kryhet në mënyrë transparente dhe pa kurrfarë problemesh”, tha ai.

Pos Mulet, varrezën masive në Rudnicë të Rashkës e ka vizituar edhe shefi i UNMIK-ut, Farid Zarif.