Sot bëhen pesë vite nga arrestimi i Jakup Krasniqit, një prej figurave të rëndësishme të luftës dhe politikës shqiptare.

Me këtë rast, i biri i tij, deputeti Altin Krasniqi, ka reaguar publikisht duke shprehur zhgënjimin e tij ndaj Gjykatës Speciale dhe procesit të gjatë të paraburgimit ndaj babait të tij, raporton lajmi.net

“1,826 ditë pritje.
1,826 ditë dhimbje e krenari.”

Kështu e nis reagimin e tij Krasniqi, duke theksuar se këto pesë vite kanë qenë vite pritjeje, dhimbjeje, por edhe krenarie për qëndrueshmërinë e babait të tij, që edhe në pleqëri po përballet me padrejtësinë me dinjitet dhe forcë.

“Lufta e UÇK-së nuk lindi nga dëshira për luftë, por nga domosdoshmëria për liri. Shqiptarët e Kosovës për vite të tëra kërkuan drejtësinë e mohuar – me protesta, me fjalë, me thirrje për barazi – por sa herë kërkonin të drejtat e tyre, shtypeshin edhe më shumë.”

Postimi i tij i plotë:

1,826 ditë pritje.

1,826 ditë dhimbje e krenari.

Sot bëhen pesë vite që ne presim drejtësi, ndërsa babi, edhe sot, në pleqëri, po sakrifikon si atëherë, me dinjitet e forcë.

Lufta e UÇK-së nuk lindi nga dëshira për luftë, por nga domosdoshmëria për liri. Shqiptarët e Kosovës me vite kërkuan drejtësinë e mohuar, herë me protesta e herë me parulla, por sa herë që kërkonin barazi, ata shtypeshin edhe më shumë.

Për vite të tëra, shqiptarët e Kosovës u vranë, u masakruan, u dëbuan, u burgosën e u zhdukën nga policia dhe ushtria serbe, ndërsa bota perëndimore kishte lënë në harresë të drejtën e tyre për të jetuar me dinjitet. Prandaj ata kërkuan me armë atë që me vite iu ishte mohuar me fjalë. Dhe e fituan lirinë me shumë gjak të derdhur dhe me shumë sakrifica, ajo nuk u dhurua.

Ndërsa sot, në korridoret e ftohta e të errëta të drejtësisë evropiane, po gjykohet e drejta për liri. Atje nuk po gjykohen individët, por lufta e drejtë dhe çlirimtare e një populli që pranoi se më mirë ishte të jetonte një sekond në liri sesa një jetë në robëri, sepse e dinin se popujt që i nënshtroheshin robërisë zhdukeshin.

Prandaj, a është kjo drejtësi me standarde evropiane?

A është drejtësi kur mbahesh për 5 vite në paraburgim?

A është drejtësi t’i barazosh viktimën me agresorin?

Jo! Kjo nuk është drejtësi. Është vazhdim i padrejtësisë historike ndaj shqiptarëve.

Në këto 5 vite ne nuk u dorëzuam, sepse, siç kishte thënë edhe babi: “Njeriu është më i fortë se guri,

atë që s’e duron guri, e duron njeriu.”

Por babi, tashmë në moshë të shtyrë, ka mbajtur mjaft barrën e padrejtësisë.

Ndërsa ne presim, koha kalon dhe drejtësia e vonuar bëhet padrejtësi e qëllimshme./Lajmi.net/