Po bëhen gati më shumë se 20 orë që Kaçaniku dhe e gjithë Kosova u tronditën nga vrasje e rreshterit të Policisë së Kosovës, Muhamed Lika.

Incidenti ndodhi mbrëmë rreth orës 23:00 në rrugën “Idriz Seferi” në Kaçanik.

Viktima Lika ishte duke hyrë ndërtesën ku banon, në momentin kur ndodhi sulmi me armë.

Lajmi.net ka kontaktuar me Policinë e Kosovës para pak minutash për të parë nëse janë në gjurmët e të dyshuarve, nga Policia bëjnë me dia se ende nuk kanë informacione, por që po vazhdojnë kërkimin e madh për kapjen dhe identifikimin e tyre.

“Aktualisht nuk kemi ndonjë të arrestuar, po punojmë për kapjen e tyre”, tha për lajmi.net zëdhënësi i Policisë së Kosovës për rajonin e Ferizajt, Kanun Veseli.

Ndërkaq sot, kryeprokurori i Prokurorisë Themelore në Ferizaj, Burim Çerkini, ka dhënë detaje të reja lidhur me vrasjen e rreshterit të Policisë së Kosovës, Muhamed Lika.

Sipas tij, dy të dyshuarit janë larguar në këmbë nga vendi i ngjarjes dhe deri më tani nuk ka informacione që viktima kishte pasur ndonjë problem me dikë.

Në një konferencë për media, Çerkini ka thënë se bazuar në provat e mbledhura, autorët e dyshuar janë parë duke u larguar nga banesa ku ndodhi vrasja.

“Nga ajo që shihet deri më tani, ata kanë ikur në këmbë. Nuk kemi të dhëna që kanë shfrytëzuar ndonjë veturë apo ndonjë mjet tjetër për t’u larguar nga vendi i ngjarjes”, tha ai.

Madje ai shtoi se në vitin 2021, lokalit të tij i ishte vënë flaka.

Megjithatë, Prokuroria Themelore në Ferizaj thotë se deri më tani nuk ka gjetur ndonjë lidhje mes djegies së lokalit dhe vrasjes makabre që tronditi Kaçanikun mbrëmë.

Tutje për rastin ka reaguar edhe ministri i Punëve të Brendshme, Xhelal Sveçla, i cili u bëri thirrje dorasëve të dorëzohen në Polici, pasi i gjithë aparati shtetëror është i mobilizuar të zbulojë të dyshuarit.

“Sulmi ndaj çdo pjesëtari të Policisë së Kosovës është sulm i drejtpërdrejtë ndaj ndaj rendit, institucioneve dhe sigurisë së Republikës së Kosovës”, ka shkruar ai.

“Ftoj dorasin apo dorasit që sa më parë të dorëzohen në organet e rendit, meqë i gjithë aparati shtetëror pa hezitim dhe pa kursim është i mobilizuar të zbulojë dhe arrestojë të gjithë ata që janë përfshirë në këtë vrasje”, vazhdon reagimi i tij.

Ndërkohë, familjarët, kolegët dhe miqtë e rreshterit që humbi jetën, janë të tronditur nga vrasja e tij.

Familja ka njoftuar se Muhamed Lika është varrosur sot pas namazit të ikindisë, në fshatin Shtrazë të komunës së Kaçanikut.

Hetimet po vazhdojnë ende, ndërsa Prokuroria po punon për të zbardhur motivin dhe për të sjellë para drejtësisë përgjegjësit e kësaj vrasjeje tronditëse./Lajmi.net/