Serbia nuk e ka lejuar sërish hyrjen e ministrit Hajrullah Çeku në Preshevë.

Kështu ka njoftuar kryetarja e kësaj komune Ardita Sinani, e cila tha se diskriminimi ndaj shqiptarëve po vazhdon.

Kjo është hera e dytë që ministrit Çeku i ndalohet të vizitojë Preshevën.

“Ky është një tjetër akt i politikës nacionaliste serbe, e cila fshihet pas një fasade pro-evropiane, por në realitet ushqen një regjim autoritar që shkel të drejtat e njeriut dhe të minoriteteve”, ka shkruar Sinani.

Tutje ajo ka thënë se ky regjim vazhdon të përkëdhelet nga Perëndimi për arsye gjeostrategjike, teksa shqiptarët e Luginës përballen me diskriminim dhe izolim.

“Presheva është e vendosur të mbajë lidhjet me të gjitha vendbanimet shqiptare dhe të forcojë bashkëpunimin me Kosovën e Shqipërinë. Përpjekjet për të na penguar vetëm na bëjnë më të fortë”, ka shkruar Sinani në rrjetin e saj social në Facebook. /Lajmi.net/