Drejtori i Shërbimeve Publike në Komunën e Prishtinës, Leutrim Retkoceri, i ka bërë thirrje Ministrisë së Mjedisit, Planifikimit Hapësinor dhe Infrastrukturës që sonte në mesnatë të hapë deponinë në Mirash, në mënyrë që të mundësohet largimi i mbeturinave nga kryeqyteti.

“Qytetarët e Prishtinës nuk duhet ta paguajnë çmimin e përplasjeve politike. Sonte në orën 12:00, kërkojmë që dyert e deponisë në Mirash të hapen për t’u larguar mbeturinat në kryeqytet”, ka deklaruar Retkoceri.

Ai ka kërkuar që situata të zgjidhet sa më shpejt, duke theksuar se qytetarët e Prishtinës nuk duhet të përballen me pasojat e përplasjeve politike.

Retkoceri ka paralajmëruar se, nëse kërkesa për hapjen e deponisë nuk merret parasysh, Komuna mund të ndërmarrë veprime të tjera.

“Në të kundërtën, veprimet tona nuk do të jenë më të njëjta”, ka paralajmëruar ai. /Lajmi.net/