Prokuroria Themelore në Mitrovicë ka njoftuar se ka ndaluar një person lidhur me aksidentin e rëndë të trafikut që ndodhi mëngjesin e sotëm në fshatin Studime, në magjistralen Mitrovicë–Prishtinë, ku humbi jetën një grua, ndërsa katër persona të tjerë mbetën të lënduar.

“Prokuroria Themelore në Mitrovicë – Departamenti për Krime të Rënda ka ndaluar një (1) person për shkak të veprës penale ‘Ngasja në gjendje të paaftë apo të dehur’. I dyshuari mëngjesin e sotëm në fshatin Studime, në magjistralen Mitrovicë–Prishtinë, në gjendje të dehur ka vozitur veturën në shiritin e kundërt të rrugës duke shkaktuar një aksident me një veturë tjetër, ku për pasojë një grua ka mbetur e vdekur, ndërkaq shoferi dhe tre pasagjerët kanë marrë lëndime serioze dhe po marrin tretman mjekësor në QKUK”, thuhet në njoftimin e Prokurorisë.

Me urdhër të prokurorit kujdestar, trupi i pajetë i viktimës është dërguar në Institutin e Mjekësisë Ligjore për kryerjen e autopsisë, ndërsa ndaj të dyshuarit është caktuar masa e ndalimit.

Sipas Policisë së Kosovës, aksidenti ka ndodhur rreth orës 05:00 në rrugën nacionale Mitrovicë-Prishtinë, në fshatin Studime.

“Rreth orës 05:00, në rrugën nacionale Mitrovicë–Prishtinë, në fshatin Studime, është shkaktuar një aksident trafiku ku janë përfshirë dy automjete. Aksidenti ka rezultuar me pasoja fatale, ku një femër raportohet se ka humbur jetën dhe disa persona të tjerë kanë marrë lëndime trupore. Ekipet emergjente dhe zjarrfikësit kanë reaguar në vendin e ngjarjes, ndërsa policia po zhvillon hetime për të konstatuar shkaqet e aksidentit”, deklaroi zëdhënësi i Policisë së Kosovës, Daut Hoxha.

Hetimet lidhur me rastin janë duke vazhduar. /Lajmi.net/