Kryetari i Sindikatës së Policisë së Kosovës dhe zyrtari policor, Avdi Hoti, është nderuar me një letër falënderimi nga familjarët e një vajze 9-vjeçare, të cilës i shpëtoi jetën pas një ndërhyrjeje të shpejtë dhe profesionale.

Sipas njoftimit të publikuar nga Sindikata e Policisë së Kosovës, ngjarja kishte ndodhur më 24 korrik 2026, kur vajza kishte mbetur pa frymëmarrje gjatë udhëtimit në autostradë.

Falë reagimit të menjëhershëm të zyrtarit Hoti, vajzës iu ofrua ndihma e parë në vendin e ngjarjes, duke i rikthyer frymëmarrjen deri në mbërritjen e ekipit mjekësor. Ndërhyrja e tij rezultoi vendimtare për shpëtimin e jetës së 9-vjeçares.

Në shenjë mirënjohjeje për veprimin e tij human dhe profesional, familjarët i dorëzuan Avdi Hotit një letër falënderimi, duke vlerësuar përkushtimin, gjakftohtësinë dhe humanizmin që tregoi në një moment kritik.

Sindikata e Policisë së Kosovës e ka cilësuar këtë rast si një dëshmi të profesionalizmit dhe përkushtimit të zyrtarëve policorë, duke theksuar se veprime të tilla pasqyrojnë misionin e Policisë së Kosovës për t’i shërbyer dhe mbrojtur qytetarët në çdo rrethanë. /Lajmi.net/