Sekretarja e përgjithshme e PDK-së, Vlora Çitaku, ka reaguar ashpër ndaj gjendjes në sektorin e energjisë në Kosovë, duke e cilësuar si të kapur nga krimi dhe e kontrolluar nga grupe të mbyllura.

Përmes një statusi në rrjetin social Facebook, Çitaku tha se tashmë nuk është më befasi që gjithçka në sektorin e energjisë – nga tenderët, te licencat e deri te ndërprerjet e energjisë elektrike – po vendoset në mënyrë të paligjshme përmes grupeve të koordinuara në WhatsApp.

“Krimi në sektorin e energjisë ka marrë përmasa galopante. Sot gjithçka vendoset në grupe të mbyllura në WhatsApp, nga tenderët, te licencat, e deri te ndërprerjet e energjisë elektrike. Dhe në ato grupe janë të përfshirë krerët e kupolës së Vetëvendosjes, ashtu siç tashmë është e dokumentuar edhe nga Prokuroria,” shkroi Çitaku.

Ajo shtoi se përkundër këtyre zhvillimeve, pasojat nuk i ndiejnë ata që marrin vendimet, por qytetarët e thjeshtë.

“Faturën, me gjithë pasojat, po e paguajnë qytetarët, çdo muaj, çdo ditë, çdo orë,” përfundoi Çitaku.

PDK ka kërkuar disa herë që të nisë hetim rreth menaxhimit të sistemit energjetik në vend dhe dyshimeve për korrupsion./Lajmi.net/