Mbi 127 milionë euro për shtesat për fëmijë brenda një viti dhe mbi 23 milionë euro për lehonat e papuna, por pa ndryshim në përfitimet mujore
Edhe pse rritja e shtesave për nënat lehona në nivelin e pagës minimale ishte prezantuar si një nga zotimet kryesore të Qeverisë, ende nuk ka një vendim konkret për zbatimin e këtij premtimi, disa muaj pas formimit të institucioneve dhe miratimit të buxhetit për vitin 2026. Kjo pasi gratë lehona nuk i kanë marrë shtesat…
Lajme
Edhe pse rritja e shtesave për nënat lehona në nivelin e pagës minimale ishte prezantuar si një nga zotimet kryesore të Qeverisë, ende nuk ka një vendim konkret për zbatimin e këtij premtimi, disa muaj pas formimit të institucioneve dhe miratimit të buxhetit për vitin 2026.
Kjo pasi gratë lehona nuk i kanë marrë shtesat për muajt janar e shkurt, në lartësi të pagës minimale prej 425 eurosh.
Në muajt që lamë pas, lehonave shtesat e shkurtit u kanë dalë në vlerë të 325 eurove, ndonëse pagesa mujore në vlerë të pagës minimale ka qenë premtim në programin qeverisës të Vetëvendosjes.
Përmbushjen e këtij zotimi, që në javën e parë pas marrjes së mandatit, e pati premtuar kryeministri tani në detyrë, Albin Kurti, në Kuvend para se të votohej kabineti qeveritar në tetor.
Edhe pse një gjë e tillë ishte paraparë, deri Qeveria nuk ka marrë vendim për rritjen e këtyre shtesave.
Kurse javë më parë nga Ministria për Punë, Familje dhe Vlerat e Luftës Çlirimtare kanë thënë se rritja do të bëhet me vendim të Qeverisë, porse nuk kanë treguar se kur do të ndodhë.
“Lidhur me pyetjen e parashtruar rreth lartësisë dhe shumës së përfitimeve të shtesave për lehona në vlerën e pagës minimale prej 425.00 eurosh ju njoftojmë se për çdo rritje të shtesave për lehona apo përfitimeve të tjera do të rregullohet me vendim të Qeverisë dhe Ministrisë, në kuadër të të cilave vendime do të përcaktohet edhe mënyra e zbatimit”.
Kurse nga ministria nuk ishte bërë e ditur nëse këto pagesa do kthehen në mënyrë retroaktive.
Lajmi.net ka kërkuar të dhëna nga Ministria për Punë, Familje dhe Vlerat e Luftës Çlirimtare se sa është buxheti i shpenzuar për kategoritë si shtesa për fëmijë dhe për lehona gjatë viteve që lamë pas.
Kësisoj sipas këtyre të dhënave, për shtesat e fëmijëve në vitin 2025 janë shpenzuar mbi 127 milionë euro, që paraqet një rritje të ndjeshme krahasuar me rreth 78 milionë euro në vitin 2024 dhe afro 48 milionë euro në vitin 2023.
Rritje vërehet edhe te mbështetja për nënat lehona. Për lehonat e papuna janë ndarë rreth 23 milionë euro në vitin 2025, mbi 15 milionë euro në vitin 2024 dhe rreth 15 milionë euro në vitin 2023.
Ndërkaq, për lehonat e punësuara, shpenzimet kanë arritur në mbi 6 milionë euro në vitin 2025, krahasuar me rreth 3.5 milionë euro në vitin 2024 dhe afro 3.4 milionë euro në vitin 2023, shkruan lajmi.net.
Ndryshe premtimi për rritjen e shtesave ishte bërë në Kuvend para votimit të kabinetit qeveritar në tetor, ku ishte zotuar se kjo do të realizohej që në javën e parë të mandatit. Megjithatë, edhe pas kalimit të disa muajve dhe miratimit të buxhetit për vitin 2026, një vendim konkret për këtë çështje nuk është marrë.
Në anën tjetër, rreth pesë muaj më parë, ministri në detyrë i Financave, Hekuran Murati, kishte njoftuar se me rritjen e pagës minimale në 500 euro, nga viti i ardhshëm do të rriten edhe shtesat për nënat lehona në këtë nivel. Ky njoftim kishte rritur pritjet se ndryshimi do të ndodhte shpejt dhe do të reflektohej menjëherë në pagesa.
Sipas këtij njoftimi, një nënë lehonë e papunë do të përfitonte rreth 3 mijë euro për gjashtë muaj, ndërsa shtesat për fëmijë do të arrinin në rreth 1 mijë e 80 euro në vit. Në total, mbështetja për vitin e parë do të kalonte mbi 4 mijë euro, ndërsa për secilin fëmijë deri në moshën 16 vjeçare do të tejkalonte 20 mijë euro.
Megjithatë, deri më tani këto mbeten në nivel deklarimesh. Mungesa e një vendimi zyrtar për rritjen e shtesave në 500 euro vazhdon të lërë në paqartësi mijëra përfituese, duke theksuar hendekun mes premtimeve publike dhe zbatimit të tyre në praktikë.
Shtesat për lehona kanë pasur efekt demografik, megjithëse jo shumë të theksuar. Sipas Agjencisë së Statistikave të Kosovës, krahasuar me shtatorin e 2021-ës kur është marrë ky vendim e deri më 2024, numri i lindjeve është rritur për rreth dy mijë fëmijë në vit.
Ndërkaq më 2025 ka rënë për 4 mijë lindje, krahasuar më 2024-tën, kur u regjistruan mbi 31 mijë lindje./Lajmi.net/
