Lazareviq ka qenë i akuzuar bashkë me gjeneralët serbë Nebojsha Pavkoviq, Sreten Llukiq dhe Vllastimir Gjorgjeviq, për përgjegjësinë komanduese dhe për dëbimin e shqiptarëve nga Kosova.

Ai ishte dënuar me 15 vjet burgim, mirëpo pas shqyrtimit të ankesës së tij dhe të avokatëve, dënimi i është zbutur për një vit.

Lazareviq për të përditshmen serbe “Politika” ka thënë se “nuk e di përse i ka humbur 10 vite të çmuara të jetës së tij”, duke potencuar se ”megjithatë ka arritur të tejkalojë Hagën”.

Sipas tij, pavarësisht periudhave të vështira për shkak të sëmundjes së tij në burg, asnjëherë nuk ka menduar për asgjë tjetër përveç fitores ndaj të pavërtetave dhe rreth asaj se duhet t’i përballojë të gjitha.

“Gjatë gjithë kohës kam luftuar vetëm për të vërtetën, për Serbinë dhe për jetën time”, ka thënë Lazareviq.