Ndryshe janë përvjedhur disa parregullsi e një ndër to është ndërprerja e procesit zgjedhor por ka edhe shkelje të tjera. Kështu është shprehur Riza Smaka, njohës i çështjeve kushtetuese në emisionin “Kontakt” në Tribuna Channel.

Gjykata Kushtetuese sipas profesor Smakës duhet që ta nxjerr aktvendimin para se të bëhet dorëzim-pranimi i detyrës nga presidentja Jahjaga te presidenti i ri, Thaçi. Ai ndër të tjera ka thënë se vendimi i Gjykatës Kushtetuese duhet të respektohet nga të gjithë, pavarësisht se çfarë do të jetë ai.

“Opozita do të duhet medoemos ta respektojë vendimin e Gjykatës Kushtetuese çfarëdo që të jetë ai. Edhe në rast që nuk gjen shkelje, opozita nuk duhet më ta kontestojë zgjedhjen e Thaçit president”, ka deklaruar Smaka në “Kontakt”.

Sipas profesorit zgjedhja e presidentit është dashtë të bëhet pas zgjedhje të parakohshme dhe jo në këtë situatë.

“Unë gjykoj që Thaçi do t’i kishte pozitat solide çfarë i ka pasur tani edhe pas zgjedhjeve të jashtëzakonshme, sepse e ka një subjekt politik të konsoliduar dhe ato vota (plus-minus) do t’i këtë gjithmonë dhe për hirë të rrethanave zgjedhja e presidentit është dashtë të bëhet pas zgjedhjeve të jashtëzakonshme”, ka thënë ai.

Smaka ka folur edhe për luhatjet përbrenda bllokut opozitar, për bojkotin e Kuvendit dhe për zgjedhjet e mundshme të parakohshme./Tribuna/