Posedonin 5 pako me kanabis, arrestohen dy dibranë

Dy persona janë arrestuar në hyrje të qytetit të Burrelit, pasi në makinën e tyre u zbuluan 5 pako me lëndë narkotike, e dyshuar si kanabis sativa.

Lajme

07/06/2016 21:09

Efektivët e policisë së Matit kanë njoftuar se janë arrestuar shtetasi Jetmir Skuka, 21 vjeç, banues në Maqellarë, Dibër dhe Gentian Capa, 37 vjeç, banues në fshatin Bllatë, Dibër.

Në njoftimin e policisë së Matit thuhet: “Mbi bazën e informacioneve të marra në rrugë operative, efektivët kanë ndaluar dhe ushtruar kontroll në një automjet tip “Benz” me targa “AA 109 KI” që drejtohej nga shtetasi Gentian Capa. Si rezultat i kontrollit, poshtë sediljes së parë të pasagjerit u evidentua një çantë ku brenda saj kishte 5 pako. Brenda tyre kishte lëndë të dyshuar kanabis sativa”.

Gjithashtu në automjet gjatë kontrollit është evidentuar edhe një dorezë boksi metalike. Policia bën të ditur se në automjet udhëtonte si pasagjer shtetasi Jetmir Skuka. Të dy shtetasit janë shoqëruar në Komisariatin e Policisë Mat për veprime të mëtejshme.

Mësohet se lënda narkotike, doreza e boksit dhe automjeti u sekuestruan në cilësinë e provës materiale.

Materialet proceduriale do t’i kalojnë për veprime të mëtejshme Prokurorisë pranë Gjykatës së Rrethit Gjyqësor Mat për veprën penale “Trafikim i narkotikëve në bashkëpunim” dhe “Mbajtje pa leje e armëve të ftohta”.