Pakistanezja e krishterë lirohet nga burgu, vendndodhja nuk dihet
Ministria e Jashtme e Pakistanit i hodhi poshtë raportet se Asia Bibi, një grua e krishterë, e cila është liruar nga akuzat për blasfemi javën e kaluar, është larguar nga vendi.
Bota
Bibi u lirua nga burgu të mërkurën, konfirmuan avokati i saj, Saiful Mulook, dhe presidenti i Parlamentit Evropian, Antonio Tajani.
“Asia Bibi ka dalë nga burgu dhe është transferuar në një vend të sigurt”, shkroi Tajani në Twitter.
Avokati Mulook u citua të ketë thënë se Bibi është larguar nga Pakistani me familjen e saj, por nuk tha se ku.
Zëdhënësi i Ministrisë së Jashtme të Pakistanit, Mohammad Faisal, e mohoi këtë.
Bibi ka kaluar tetë vjet në burg, në pritje të dënimit me vdekje për, siç është thënë, fyerjen e Profetit Muhamed.
Javën e kaluar, Gjykata Supreme e Pakistanit e shfuqizoi dënimin, duke shkaktuar protesta të dhunshme që bënin thirrje për ekzekutimin e Bibit.