Kuvendi i Kosovës ende nuk e ka futur në agjendë ratifikimin e kësaj marrëveshje. Opozita vazhdimisht e ka kundërshtuar dhe duket të jetë konsistente në qëndrimet e saj karshi kësaj çështje. Arsyeja e kundërshtimit të tyre, është se me këtë marrëveshje Kosova ia fal rreth 8 mijë hektarë Malit të Zi, shkruan lajmi.net

Por çfarë do të ndodhë me liberalizimin e vizave, nëse marrëveshja e Demarkacionit nuk ratifikohet në Kuvendin e Kosovës. Mos ratifikimi sipas ministrit të Integrimeve Evropiane, Bekim Çollaku, do të rrezikonte liberalizimin e vizave.

Sipas ministrisë që drejton Çollaku, ratifikimi i marrëveshjes është kusht për këtë proces dhe tashmë MI konsideron se puna ka mbetur të Kuvendi dhe partitë politike që të vendosin për procedimin e kësaj çështje.

“Ne nuk mund të komentojmë për çështjet që i takojnë Kuvendit të Kosovës, por mund të përsërisim se ratifikimi i marrëveshjes me Malin e Zi është kusht dhe duhet të ndodh para se të filloj lëvizja pa viza. Në këtë drejtim i takon Kuvendit dhe partive politike në vend të vendosin për kohën dhe mënyrën e procedimit të mëtutjeshëm të kësaj çështje”, thuhet në një përgjigje të MI-së, për lajmi.net

Opozita e cila është duke bojkotuar seancat e Kuvendit, janë shprehur se në rast se futet në agjendë ratifikimi i Demarkacionit, do të marrin pjesë për të kundërshtuar me çdo formë. Ndërkaq, këtë marrëveshje me Malin e Zi tashmë po e kundërshtojnë edhe disa deputetë të pozitës, ndërkohë që krerët e shtetit po e marrin si punë të kryer. /lajmi.net