“Politike dhe ekonomike”, Borrell i përshkruan masat që mund të merren nëse nuk shtensionohet situata në veri

Bashkimi Evropian është i gatshëm të marrë masa të reja, politike dhe financiare, ndaj Kosovës dhe Serbisë në rast se këto të dyja nuk shënojnë progres në shtensionimin e situatës. Kështu ka paralajmëruar përfaqësuesi i Lartë i BE-së për Politikë të Jashtme, Josep Borrell, teksa ka folur edhe për lirimin e tre policëve të marrë…

Lajme

26/06/2023 19:09

Bashkimi Evropian është i gatshëm të marrë masa të reja, politike dhe financiare, ndaj Kosovës dhe Serbisë në rast se këto të dyja nuk shënojnë progres në shtensionimin e situatës. Kështu ka paralajmëruar përfaqësuesi i Lartë i BE-së për Politikë të Jashtme, Josep Borrell, teksa ka folur edhe për lirimin e tre policëve të marrë peng në territorin e Kosovës nga Serbia.

Në konferencën pas mbledhjes së Këshillit për Punë të Jashtme të BE-së, Borrell ka potencuar se nga anëtarët e ardhshëm të Bashkimit Evropian presin një sjellje evropiane, raporton KosovaPress.

Ai ka thënë se shtetet anëtare nënvizojnë shqetësimet e tyre të forta për tensionet e vazhdueshme në veri të Kosovës dhe theksojnë rëndësinë e palëve për të de-përshkallëzuar në përputhje me atë që është thënë në deklaratën e 3 qershorit.

“Ne mirëpresim lirimin e tre policëve të Kosovës që ishin mbajtur në Beograd. Shtetet anëtare do të marrin masa nëse është e nevojshme për të rritur ndikimin e Bashkimit Evropian dhe për të mbështetur dialogun për normalizim. Më lejoni të theksoj se zgjedhjet duhet të organizohen në të katër komunat e veriut në kuadër të pjesëmarrjes së kushtëzuar të serbëve të Kosovës në këto zgjedhje dhe të dyja palët duhet të tregojnë gatishmëri për të zbatuar obligimet e tyre për dialog. Shtetet anëtare mbeten të gatshme për të marrë masa të mëtejshme nëse nuk shihet përparim. Për anëtarët e ardhshëm të Bashkimit Evropian presim një sjellje evropiane. Në ditët në vijim, ne do të vazhdojmë kontaktet tona me të dyja palët, dhe shtetet anëtare janë të gatshme të jenë aktive dhe të mbështesin punën tonë”, ka thënë ai.

Siç ka thënë ai, masat që mund të merren janë politike dhe financiare.

“Masat janë politike dhe financiare. Ne, shtetet anëtare dhe Komisioni, mund të konsiderojmë marrjen e masave politike për të kufizuar kontekstin politik dhe për të vendosur masa financiare për të përshtatur bashkëpunimin tonë sipas sjelljes së tyre. Por duhet të ketë masa. U thashë shteteve anëtare, çdo gjë duhet të jetë proporcionale dhe duhet të jetë e kthyeshme… Ne kemi një qasje shumë të strukturuar për këto gjëra. Nesër nisin grupet e ndryshme. Niveli i duhur i grupit të punës do të fillojë të flasë për këtë dhe çfarë mund të ndodhë nëse nuk do të arrijmë një marrëveshje për zgjedhjet e reja, dhe grupi do të vlerësojë situatën dhe do të fillojë të diskutojë masat tona të ndryshme që mund të merren, politike apo tjera”, vijoi ai.

I pyetur se sa do të presë BE-ja për marrjen e këtyre masave, përfaqësuesi i Lartë i BE-së për Politikë të Jashtme tha se kjo varet nga grupi punues, i cili do të nisë punën qysh nesër.

“Fatkeqësisht nuk mund të përgjigjem. Nuk mund të përgjigjem sepse kjo është fatkeqësisht diçka që duhet bërë nga PSE. Ata duhet të fillojnë punën për këtë… Nëse bëhen thirrje për zgjedhje, nëse mbahen zgjedhje dhe njerëzit marrin pjesë, popullata merr pjesë, atëherë kjo do të thotë një gjë, nëse jo, jo”, tha Borrell.