Kapet çifti shqiptar që kultivonte lëndë narkotike në Greqi

Dy shqiptarë të moshës 31 vjeç dhe 27 vjeç janë arrestuar nga policia greke për kultivim të lëndëve narkotike.

Lajme

21/04/2016 10:59

 

Bashkë me ta u arrestua edhe një shtetas i huaj 27-vjeçar. Sipas mediave greke, shqiptarët janë një burrë dhe një grua, të cilët jetonin në ishullin Kalymnos dhe merreshin me kultivimin e kokainës, heroinës dhe të kanabis sativës.

Të pandehurit transportonin lëndën e parë nga Athina drejt ishullit ku banonin dhe më pas e kultivonin duke nxjerrë përfitime të mëdha ekonomike. Mëngjesin e së mërkurës(dje), 31-vjeçari shqiptar udhëtoi me traget nga porti i Pireut drejt ishullit Kalymnos dhe u prangos në flagrancë nga policia sapo zbriti në tokë.

Ai mbante me vete një çantë, brenda së cilës kishte fshehur mbi 1 kilogram heroinë, kërp të papërpunuar me peshë 1 kg. Gjithashtu atij iu sekuestruan edhe 2 celularë, 11 karta SIM, një laptop, fatura bankare dhe një fletore me shënime me shkrim dore.

Kurse, gjatë kontrollit në banesë në ishull ku jetonte së bashku me gruan shqiptare, u gjetën dhe u sekuestruan 130 gr kokainë, 131 gr heroinë, 678 gr kanabis i papërpunuar, një peshore elektronike, dy celularë dhe 529 Euro.

Gjithashtu, në shtëpinë e shtetasit të huaj u gjetën disa doza kokaine, një filiz kanabisi 20 cm e kultivuar në kopsht, një celular dhe një biçikletë që e përdorte për të shpërndarë drogën.