Ministri i Punëve të Jashtme i Kosovës (MPJ), Enver Hoxhaj ka takuar Sekretarin e Përgjithshëm të Komisionit të Vendikut,  gjermanin Thomas Markert, të cilin e ka falënderuar për përkrahjen që Kosova të anëtarësohet si anëtar i plotë në këtë institucion të rëndësishëm të Këshillit të Evropës.

Sipas një njoftimi  të MPJ-së, Kryediplomati kosovar ka thënë se Kosova do të përfitojë shumë nga anëtarësimi në fushën e gjyqësorit, sistemit zgjedhor e kushtetues.

“Në takimin që kisha me Sekretarin e Komisionit të Venedikut e falënderova atë dhe shtetet anëtare për pranimin e Kosovës si shtet sovran dhe i pavarur. Kosova do të përfitoj shumë nga anëtarësimi në disa fusha të jetës sikurse gjyqësori, fusha kushtetuese, ajo zgjedhore dhe rishikimi i legjislacionit në fuqi. Për më tepër, anëtarësimi i Kosovës në Komisionin e Venedikut është edhe hapi i parë dhe vendimtar për anëtarësimin e Kosovës në Këshillin e Evropës”, tha  Hoxhaj, pas takimit.

Nga ana e tij, Sekretari i Përgjithshëm i Komisionit të Venedikut, Thomas Markert ka thënë të ketë diskutuar për çështjet praktike të anëtarësimit të Kosovës dhe fushat ku do të punohet fillimisht.

“Takimi ndodhi pas ftesës së Komitetit të Ministrave të Këshillit të Evropës për Kosovën të bëhet anëtar i plotë i Komisionit të Venedikut. Në këtë takim ne diskutuam çështjet praktike të anëtarësimit pasi Kosova së shpejti do të ulet në këtë institucion si anëtar i pavarur dhe në nivelin e ekspertizës. Ne diskutuam edhe për planet e ardhshme, veçmas duke filluar me reformën zgjedhore dhe tema të tjera që i diskutuam së bashku”, ka deklaruar Markert, thuhet në njoftimin e MPJ-së.

Ministri Hoxhaj ka takuar në Strasburg edhe Sekretarin e Përgjithshëm të Këshillit të Evropës, Thorbjon Jagland, me të cilin ka diskutuar për agjendën e aplikimit këtë vit të Kosovës dhe të anëtarësimit të shpejt.