Agresiv, aeroplani rus shëtit nëpër ajrin suedez si në “bahçe të babës”!
Mbi Detin Baltik ka ndodhur një incident i ri ndërkombëtar pasi një aeroplan gjuajtës rus Su-27 kreu një manovër të rrezikshme dhe iu afrua më pak se një metër aeroplanit ushtarak suedez, thanë zyrtarë suedezë.
Bota
Shërbimi informativ suedez FRA të enjten publikoi një njoftim në të cilin thotë se gjuajtësi rus ka kryer një manovër agresive ndaj aeroplanit mbikëqyrës suedez dhe këtë e ka bërë në një distancë prej më pak se një metri, kurse pastaj ia ka treguar edhe arsenalin e armatimit që mbante nën njërin krah e tij. Informatorët suedezë madje publikuan edhe foton e gjuajtësit rus, nga e cila shihet tentimi frikësues agresiv dhe tregimi i “muskujve”.
Suedezët thonë se ky nuk është rast i izoluar dhe se incidente të ngjashme kanë ndodhur disa herë gjatë gjashtë muajve të kaluar.
“Në përgjithësi, në disa vite të fundit është regjistruar rritje e aktivitetit ushtarak mbi Baltik. Mes tjerash, këtu përfshihen edhe aeroplanët gjuajtës rusë që në mënyrë agresive provokojnë aeroplanët e shteteve tjera”, tha Lena Nyberg, shefe e Shërbimit informativ suedez.
Zëvendës/drejtori i Shtabit të përgjithshëm të ushtrisë suedeze, Anders Grenstad thotë se me vëmendje ndiqet aktiviteti ushtarak rus në rajon dhe thekson se sjellje e tillë agresive nuk është vërejtur që moti.
Rusia, në anën tjetër, ende nuk i ka komentuar akuzat suedeze.
Lajmi suedez për këtë sjellje agresive të aeroplanit gjuajtës rus u publikua pasi muajin e kaluar dy gjuajtës rusë Su-24 ishin vërejtur në hapësirën ajrore suedeze, në jug të Öland.