Në reagimin e Ymerit të bërë publik në faqen e VV-së në Facebook, deklaratën Thaçit e ka cilësuar si dëshmi të planit të qeverisë për të shtypur protestën paqësore.

Ai duke rikujtuar kërkesat e protestës së opozitës, ka kërkuar nga Qeveria e Kosovës që të distancohet nga deklarata e Thaçit.

“Me deklaratën e tij kërcënuese, zv.kryeministri Thaçi, e tregoi planin e Qeverisë për të shtypur protestat paqësore. Paralajmërimi i vetëm për protesta të dhunshme, po vjen nga Qeveria. Kjo pra flet për planet e qeverisë dhe aspak për planet e subjekteve opozitare.

Siç e kemi thënë deri tash, protesta e së shtunës do të jetë paqësore dhe po organizohet për realizimin e këtyre kërkesave:

– Të shfuqizohen vendimet e ZRrEE-së për shtrenjtim të energjisë elektrike,

– Trepça të shpallet me ligj ndërmarrje publike me status të veçantë,

– Të shkarkohet Hajredin Kuçi,

– Të dorëhiqet Enver Hasani,

– Të shkarkohet menaxhmenti i RTK-së dhe

– Të ndalet krijimi i Asociacionit të Komunave me Shumicë Serbe

Kërkojmë nga Qeveria e Kosovës të distancohet nga deklaratat e tilla të zv.kryeministrit Thaçi, që kanë për qëllim shtypjen me dhunë të protestave paqësore.

Në vend që Qeveria e Kosovës t’i kërcënojë qytetarët me dhunë, ajo duhet të kujdeset për mirëqenien e tyre dhe t’iu garantojë siguri gjatë protestave.”, thuhet në reagimin e Ymerit.