Të shtunën dukej se debati rreth golit më të bukur të muajit në Premierligë përfundoi kur Jack Wilshere realizoi pas një aksioni magjik duke e kaluar në epërsi Arsenalin në duelin kundër Norwichit.

Por, mesfushori shqiptar Pajtim Kasami kishte ide tjera. Të hënën mbrëma, 21-vjeçari solli kujtimet e golit të famshëm të Marco van Bastenit nga Euro 88 kur e ndali topin me gjoks para se të realizonte në mënyrë të jashtëzakonshme duke mposhtur portierin Julian Speroni në duelin të cilin Fulham e fitoi kundër Crystal Palace me rezultat 4-1.

Se goli i Kasamit ishte më i bukur se ai i Wilshere, këtë e pranoi edhe mesfushori i Arsenalit i cili menjëherë pas përfundimit të takimit shkroi: “Më humbi çmimi për golin e muajit. Përkuluni!”.