VV-ja e Nisma të kënaqur, AAK-ja dhe LDK-ja ankohen
Anëtari i Kryesisë së LDK-së, Lutfi Haziri vlerësoi se në zgjedhjet e fundit nacionale, një ndikim të madh ka pas edhe biznesi, por që kësaj radhe paraja ka pasur ndikim më të vogël.
Lajme
Paraja ka pas ndikim më të vogël në këto zgjedhje, tha Haziri në emisionin Rubikon të KTV-së.
“Biznesi ka pas një ndikim të madh. Ka qenë jashtëzakonisht vlerësues në këto zgjedhje. Por ndikimi i parasë në lëto zgjedhje ka qenë më i vogël. Vota në Kosovë përfundimisht mendoj se po lokalizohet”, tha Haziri.
Ndërkaq, Dardan Molliqaj, sekretar i Lëvizjes Vetëvendosje, tha se përfaqësimi i subjektit të tij në Kuvend do të jetë më i fuqishëm se ai i kaluari.
“Është një moment politik që VV është faktorizuar, edhe pse këtë nuk e kanë pritë. Jemi subjekti që jemi rrit më së shumti nga subjektet politike. Grupi jonë parlamentar është më i fuqishëm se ai i kaluari”, konsideron Molliqaj.
Sipas Donika Kadaj-Bujupi, nga Aleanca për Ardhmërinë e Kosovës, pushteti ka provuar që edhe kësaj radhe të blejë votën.
Ndërsa, nënkryetari i Nismës, Bilall Sherifi tha se Nisma doli befasia e këtyre zgjedhjeve, ashtu edhe siç kishin premtuar. Ai e vlerësoi garën si jo të barabartë.