Vriten afro 100 militantë në Pakistan
Zyrtarët e sigurisë në Pakistan thanë se nga sulmet me aeroplanë luftarakë, sot herët në mëngjes, janë vrarë së paku 100 militantë.
Bota
Sipas këtyre zyrtarëve të sigurisë, sulmet me aeroplanë janë kryer kundër së paku tetë strehimeve të militantëve, në pjesën e trazuar veriperëndimore të këtij vendi.
Këto burime thanë që lideri militant, Abu Abdul Rehman, që mendohet se ka ndihmuar në orkestrimin e okupimit të aeroportit në Karaçi për pesë orë, më 8 të këtij muaji, është në mesin e të vrarëve.
Në shënjestër të këtyre sulmeve ishte hapësira malore Dehgan, afro 25 kilometra në perëndim të Miranshahut, që është kryeqytet i rajonit fisnor Uaziristani Verior, njëherësh bazë e fuqishme e militantëve të ndërlidhur me al-Qaedan dhe talibanët.