Ish ngasësja testuese në Formula 1, Maria de Villota është gjetur e vdekur në moshën 33-vjeçe. Radio Cadena Ser raportoi se Villota vdiq në dhomën e një hoteli në Sevilla pavarësisht përpjekjeve të stafit mjekësor për ta këndellur atë.

Deri më tani nuk ka detaje të tjera por në një komunikatë të publikuar në profilin e saj zyrtar në rrjetin social Facebook, shkruante: “Miq të dashur: Maria na ka lënë. Ajo u desh të shkonte në parajsë sikurse të gjithë engjëjt. I falënderohemi Zotit për kohën që e ka lënë së bashku me ne”.

Kurse, një zëdhënëse e policisë deklaroi: “Dyshojmë se bëhet fjalë për vdekje natyrale, por nuk mund të konfirmojmë ende asgjë”, para se të njoftojë se ekspertët e forenzikës dhe policia nga njësiti i vrasjeve kishin ardhur për ta ekzaminuar rastin.

De Villota ishte në Sevilla për tu paraqitur në konferencën “What Really Matters”, që u anulua. Ajo kishte bërë bujë në korrik 2012, kur humbi njërin sy pasi ishte përfshirë në një aksident me ekipin e Marussias në F1.