Zyrtarët qeveritarë dhe rebelët kanë njoftuar se tre civilë janë vrarë dhe një është plagosur rëndë si rezultat i granatimit të shtëpisë së tyre në Luhansk, transmeton REL.

Dy ushtarakë ukrainas janë vrarë nga raketa e hedhur prej separatistëve në qytetin Schastya, që gjendet 20 kilometra larg Luhanskut.

Një zëdhënës i rebelëve pro-rusë ka thënë se tre civilë janë vrarë dhe 19 janë plagosur, gjatë luftimeve të 24 orëve të fundit në republikën e vetëshpallur të Donjeckut.

Një reporter i agjencisë AFP, në qytetin Makiiva i cili kufizohet me Donjeckun, ka thënë se tri ndërtesa janë përfshirë nga zjarri pas gjuajtjes me mortaja.

Një grua në vend të ngjarjes ka thënë se gjyshja e saj është vrarë dhe gjyshi është plagosur pasi granatat kanë goditur shtëpinë e tyre.

Raportet për viktima të reja vijnë pasi të shtunën ka dështuar mbajtja e një takimi në Minsk, i cili kishte për qëllim arritjen e paqes .

Më shumë se 5,100 viktima janë raportuar që nga fillimi i konfliktit në prill të vitit të kaluar.