Veseli tregon vendin se ku do të mbahet debati për Demarkacion (Video)

13:21 | 15 Korrik 2016

Kryetari i Kuvendit të Kosovës, Kadri Veseli ka thënë se debati për demarkacionin e kufirit me Malin e Zi është i vonuar, ndonëse ka pranuar se është më mirë që ky debat të bëhet para se të merret ndonjë vendim.

Pas mbledhjes së Kryesisë së Kuvendit, Veseli ka bërë të ditur se debati mes Kuvendit, Qeverisë, Komisionit për demarkacion dhe ekspertëve, do të mbahet më 4 gusht, në sallën alternative në Kuvend, raporton lajmi.net.

“Tryeza është e vonuar gjithsesi për as sa edhe debati në Kuvendin e Kosovës për këtë çështje si do që të jetë më mirë vonë se sa kurrë. E mira është që do të ndodh dhe që do të bisedohet lirshëm, besojë që vet përkrahja e Kryesisë së Kuvendit për këtë tregon se jemi duke bërë diçka që është në interesin e qytetarëve”, ka thënë Veseli.

“Siguroj qytetarët se sa i përket kufijve çdo vendim do të jetë në të mirë të tyre. Debati i cili do të mbahet në sallën alternative, fillon nga ora 10 dhe do të jetë i hapur për shoqërinë civile dhe për mediat”, thotë Veseli./lajmi.net