Kryeministri i Shqipërisë, Edi Rama njoftoi se do të ndajë publikisht qëndrimin e tij sa i përket armëve kimike siriane, pasditen e sotme në orën 17:00.

Këtë njoftimi Rama e shpërndau nëpërmjet profilit të tij zyrtar në rrjetet sociale Facebook dhe Twitter, në një kohë kur para kryeministrisë dhe në sheshet e vendit janë paralajmëruar protesta kundër armëve kimike.

Dhjetëra persona kanë nisur të grumbullohen para Kryeministrisë, duke iu bashkuar grupit të vogël që e gdhiu para godinës në shenjë proteste ndaj armëve kimike.

Pas kthimit nga vizita në Mal të Zi, mbrëmjen e së enjtes mësohet se Rama ka zhvilluar një tjetër bisedë telefonike me Sekretarin e Shtetit, John Kerry, ndërkohë që po ditën e premte pritet edhe mbledhja e Këshillit Ekzekutiv të Organizatës së Parandalimit të Armëve Kimike, OPAK që do të vendosë vendet dhe mënyrat e shkatërrimit të armëve kimike të Sirisë.

Mbrëmjen e së enjtes, në Top Channel, Ambasadori Amerikan në Shqipëri, Alexander Arvizu deklaroi se Shtetet e Bashkuara kanë shpenzuar shumë energji për sigurimin e teknologjisë dhe ekspertëve më të mirë botërorë për kryerjen e këtij procesi dhe një “jo” e mundshme do të zhgënjente Uashingtonin.

Paul Walker nga “Green Cross International” deklaroi publikisht se Shqipëria nuk i ka kapacitetet për shkatërrimin e armëve siriane.