Në Jemen, në ditë vriten apo plagosen tetë fëmijë, sipas të dhënave të Fondit të Kombeve të Bashkuara për Fëmijët (UNICEF), raporton Anadolu Agency.

Raporti i UNICEF-it thekson se në katër muajt e fundit, janë vrarë rreth 400 fëmijë, kurse 600 u plagosën dhe kanë mbetur me aftësi të ndryshme invaliditeti.

Gjithashtu theksohet se sistemi i shëndetësisë në këtë vend është shkatërruar plotësisht, është rritur kequshqyerja tek fëmijët, janë mbyllur shumë shkolla dhe vazhdimisht rritet numri i të rinjve me armë në dorë.

Përfaqësuesi i UNICEF-it në Jemen, Julien Harneis tha se konflikti paraqet një tragjedi të veçantë për fëmijët.

“Është numri shumë i madh i të miturve që janë vrarë si pasojë e konfliktit të armatosur në këtë vend. Shumë prej tyre i mbijetojnë këtyre sulmeve, por më vonë ballafaqohen me probleme tjera. Mungon ushqimi dhe janë të pranishme sëmundje të ndryshme. Është e domosdoshme që të parandalohet kjo tragjedi”, tha ai.

Sipas disa të dhënave, më shumë se 10 milionë fëmijë kanë nevojë për ndihmë humanitare.