Kryetari i sapozgjedhur i Graçanicës Branimir Stojanovic, thotë se ai dhe Këshilltarët Komunalw kanë nënshkruar për herë të dytë deklaratën për marrjen e detyrës.

Ai për mediat serbe ka bërë të ditur se përsëritja e këtij solemniteti është bërë me kërkesë Ministrisë së Administrimit të Pushtetit Lokal (MAPL).

Mbledhja e përsëritur për inaugurimin e strukturës së re qeverisës në Komunën e Graçanicës është bërë nën vëzhgimin e MAPL’së. Vëzhgues të kësaj ministrie kanë përcjellë këtë mbledhje inauguruese, në mënyrë që të mos përsëriten gabimet që u bënë gjatë herës së parë.

Asambleistët sërish kanë nënshkruar deklaratën zyrtare, nën monitorimin e komisionit nga Ministria.

Stojanovic ka deklaruar se gjatë mbledhjes së sotme do të evitohen të gjitha gabimet teknike të bëra më mbledhje e kaluar.

“Ne i kemi larguar tash të gjitha gabimet teknike, dhe tanimë nuk kemi asnjë problem në vazhdimin e punës”.

Dje me anë të një reagimi, MAPL ka konstatuar se në mbledhjen inauguruese të Komunës së Graçanicës, nuk janë respektuar procedurat të përcaktuara me ligjet e Kosovës.