Turqia vazhdon lobimin për Kosovën
Turqia do ta vazhdojë lobimin për pavarësinë e Kosovës dhe është e gatshme për thellim të marrëdhënieve ndërshtetërore. Kështu i ka premtuar Ministri Ahmet Davutoglu, në një bisedë, Ministrit Enver Hoxhaj.
Lajme
Turqia do të vazhdojë angazhimin e saj për të lobuar në shtimin e njohjeve të Kosovës.
Këtë e ka rikonfirmuar Ministri i Jashtëm Turk, Ahmet Davutoglu, në një bisedë telefonike me homologun e tij nga Kosova, Enver Hoxhaj.
Në një komunikatë të MPJ’së thuhet se Hoxhaj ka veçuar fuqizimin e vazhdueshëm të subjektivitetit ndërkombëtar të Kosovës, përmes njohjeve dhe anëtarësimit në organizatat e ndryshme ndërkombëtare.
Shefi i diplomacisë turke, siç njoftohet, ka premtuar se Ankaraja zyrtare shpreh përkrahjen e për avancimin e gjithanshëm të proceseve, e veçanërisht në lobimin për njohjen e mëtutjeshme të Kosovës.
“Ministri i Punëve të Jashtme i Turqisë, Ahmet Davutoglu, ka vlerësuar progresin që po arrihet në vazhdimësi në Kosovë, duke shprehur përkrahjen e shtetit të tij për avancimin e gjithanshëm të proceseve, e veçanërisht në lobimin për njohjen e mëtutjeshme të Kosovës”, thuhet në një komunikatë të Ministrisë së Punëve të Jashtme të Kosovës.
Ministri turk, po ashtu ka theksuar vullnetin e Qeverisë turke për thellimin e mëtutjeshëm të bashkëpunimit bilateral me Kosovën.
Ndërsa, Ministri i Jashtëm i Kosovës, Enver Hoxhaj, ka njoftuar homologun turk për proceset e fundit në Kosovë.
“Hoxhaj veçoi fuqizimin e vazhdueshëm të subjektivitetit ndërkombëtar të Kosovës, përmes njohjeve dhe anëtarësimit në organizatat e ndryshme ndërkombëtare”.
“Hoxhaj kërkoi vazhdimin e përkrahjes së Turqisë në përmbylljen e procesit të njohjeve për Kosovën, duke vlerësuar lart mbështetjen e deritashme të Turqisë në këtë drejtim”.
Ministri i Jashtëm i Kosovës po ashtu ka theksuar vullnetin e Qeverisë së Kosovës për thellimin e mëtutjeshëm të bashkëpunimit bilateral me Turqinë.