Lidhjes Demokratike e Kosovës ka përmbyllur fushatën elektorale për zgjedhjet e 3 nëntorit në qytetin e Rahovecit, e bindur se kandidati i saj, Fahredin Shehu do të jetë kryetar i ardhshëm i kësaj komune.

Kryetari i LDK’së, Isa Mustafa, tha para mbështetësve të tij se LDK’ja pret që në Rahovec të bëhen ndryshime dhe kjo komunë të fillojë të qeveriset në mënyrë demokratike nga një lider i cili ka profesionalizëm dhe i cili reflekton gatishmëri për zhvillim ekonomik.

“Uroj që bashkërisht të punojmë për të ardhmen e Rahovecit, të punojmë që t’i fitojmë zgjedhjet këtu në Rahovec dhe në shumicën e komunave në Kosovë, dhe në të ardhmen t’i edhe fitojmë edhe zgjedhjet nacionale, në mënyrë që ta themelojmë një qeverisje të drejtë, e cila përkujdeset për çdo komunë dhe për çdo qytetar”.

“Fahredin Shehu e meriton votën e rahovecianëve, sepse ai përfaqëson vlerat e kulturës evropiane”.

“Ju keni një njeri që e përfaqëson edhe kulturë evropiane edhe kulturën e Rahovecit, dhe ky gërshetim i kulturave është ajo që i nevojitet këtij vendi”.

“Ju keni alternativën më të mirë të votimit, dhe ju ftoj që ta votoni Fahredin Shehun dhe këshilltarët e LDK’së për Asamble Komunale, sepse janë më të mirët dhe dinë më së miri t’i mbrojnë interesat tuaja”.

Kandidati për Kryetar të Komunës së Rahovecit, Fahredin Shehu, tha se më 3 nëntor Rahoveci do t’i thotë jo mashtrimit, korrupsionit dhe shantazhit.

“Ne do të punojmë për një Rahovec të pasur dhe jo që merr ndihma humanitare. E duam një Rahovec me shkolla dhe çerdhe fëmijësh, e jo me bastore e çerdhe krimi. E duam një Rahovec me ujë të pijshëm dhe jo me gropa e mungesë të kanalizimit”.

“Ne do të punojmë që Rahoveci të ketë tri zona industriale, me trafik urban, me shkolla të reja dhe me qendra të aftësimit profesional”.