Pas publikimit të lajmit se Jack Wilshere do të mungojë për gjashtë javë për shkak të një lëndimi që pësoi në ndeshjen miqësore mes Anglisë dhe Danimarkës, tifozët e Arsenalit menjëherë sulmuan rivalët e tyre nga Liverpool.

Krejt kjo për shkak se mbrojtësi i Reds, Daniel Agger ishte ai që e lëndoi Wilsheren, dhe mbështetësit e gjigantit londinez kanë kërkuar të merren masa ndaj qendërmbrojtësit danez.

Mirëpo, përkrahësit e Liverpoolit nuk e kanë lënë pa u kundërpërgjigjur pas fyerjeve ndaj futbollistit të tyre dhe kanë reaguar në një mënyrë mjaft origjinale.

Në një postim në rrjetin social Twitter, një tifoz i Liverpoolit bëri shaka me lëndimin e Wilshere dhe mbështetësit e Arsenalit duke publikuar fotografinë e një karroce të personalizuar me logon e Arsenalit, për mesfushorin e dëmtuar.

Fotografia pa dyshim se do të pritet me hidhërim nga tifozët e Arsenalit, shumica e së cilëve nënshkruan një peticion të enjten duke kërkuar dënimin e Aggerit për ndërhyrjen e tij.

Andaj, derisa Wilshere nuk pritet të kthehet deri në fazën përfundimtare të sezonit, tensionet mes tifozëve sa vijnë e shtohen.