The Guardian demanton vetën lidhur me tekstin për Azem Sylën

Gazeta britanike The Guardian ka demantuar vetën lidhur me tekstin për hetimet ndaj disa zyrtarëve të Kosovës. 

Lajme

12/11/2014 22:24

Kjo gazetë ka publikuar tekstin korrigjues për artikullin në të cilin thoshte se Azem Syla, që po hetohet nga EULEX-i, është familjar i kryeministrit të Kosovës, Hashim Thaçi.

“Në një artikull (Ekipi i BE-së në Kosovë nis hetimet për një vrasës me pagesë, 8 nëntor, faqja 29) thuhej se një hetim ka nisur për lidhje të supozuara të një vrasësi me pagesë të dënuar dhe ish-ministrit të mbrojtjes së Kosovës, Azem Syla, që e përshkruam si dajën e kryeministrit të Kosovës, Hashim Thaçi. Ky përshkrim ishte i pasaktë.

Syla ka qenë pjesë e rrethit të brendshëm në Ushtrinë Çlirimtare të Kosovës dhe në Partinë Demokratike të Kosovës, por ai nuk është daja i tij. Gabimi ka ndodhur për shkak se Syla përshkruhet si daja i Thaçit në 4 libra të ndryshëm për Kosovën, të botuar së fundi”, ka shkruar Guardian, raporton koha.

Guardian bën korrigjime të tilla çdo ditë, por nuk i ka kërkuar falje Thaçit.

Ky i fundit e kishte kërcënuar me padi kur u publikua dosja e Dick Martyt, gjë që nuk e kishte bërë kurrë.