Thaçi: Sot u dëshmua besimi i qytetarëve në institucionet e shtetit të tyre

16:51 | 18 Prill 2015

Zëvendëskryeministri i Parë i Republikës së Kosovës, Hashim Thaçi

Zëvendëskryeministri i parë i Kosovës, njëherësh ministër i Jashtëm i Kosovës, Hashim Thaçi, duke komentuar rrjedhën e protestës së sotme, është shprehur i kënaqur me faktin se protesta ka përfunduar pa ndonjë incident.

Me këtë, Thaçi tha se u dëshmua pjekuria e qytetarëve të Kosovës dhe besimi i tyre në institucionet e shtetit të tyre.

“Më vjen mirë që protesta e sotme simbolike në pjesëmarrje ishte paqësore. Kjo dëshmon pjekurinë e qytetarëve të Republikës së Kosovës dhe besimin e tyre në institucionet e shtetit të tyre”.

“Është e vërtetë që Kosova ende përballet me sfida, por është po ashtu e vërtetë që bashkërisht kemi arritur suksese të shumta. Prandaj, të vazhdojmë t’i bashkojmë energjitë tona pozitive dhe gjithë potencialin tonë ta vëmë në shërbim të interesit tonë nacional dhe shtetëror”, ka përfunduar Thaçi shkrimin e tij në Facebook.

Protesta e thirrur nga partitë opozitare në vend ka përfunduar disa minuta pas orës 16, me thirrjet e liderëve opozitarë që qeveria të reflektojë mbi kërkesat e tyre për “ç’kapjen” e shtetit.