Shefi i Zyrës së Bashkimit Evropian në Kosovë, Aivo Orav, ka njoftuar për vizitën e Riho Terrasit në Prishtinë, raportuesit për Kosovën në Parlamentin Evropian.

Në postimin e tij në platformën “X”, Oravi ka thënë se angazhimi i BE-së me Kosovën mbetet i fortë, me mundësi të reja përpara, duke përfshirë Planin e Rritjes.

“E mirëprita këtë mëngjes në Prishtinë Riho Terrasin, raportues për Kosovën në Parlamentin Evropian, para takimeve të tij me shumë bashkëbisedues. Angazhimi i BE-së me Kosovën, si në nivel lokal, ashtu edhe nga Brukseli, mbetet i fortë si gjithmonë, me mundësi të reja në horizont, duke përfshirë Planin e Rritjes”, ka shkruar Oravi.