Terim kërkon pranimin e Kosovës në FIFA dhe UEFA
Selektori i Turqisë, Fatih Terim thotë se do të kërkojë pranimin e Kosovës në FIFa dhe UEFA. Ndeshjen miqësore në Mitrovicë e përshkruan si duel vëllazëror.
Sport
Selektori i Turqisë, Fatih Terim ka thënë se do të kërkojë pranimin e Kosovës në FIFA dhe UEFA, në paraqitjen e tij në konferencë për shtyp, para ndeshjes miqësore në Mitrovicë.
Një ditë para ballafaqimit në stadiumin Adem Jashari në Mitrovicë, Terim dhe skuadra e tij kanë mbërritur në kryeqytet për t’i zhvilluar përgatitjet e fundit për ndeshjen e nesërme. Por, Terim dha një mesazh të fuqishëm.
“Turqia do ta ndihmojë fuqishëm Kosovën në çdo aspekt. Madje, do të kërkojë pranimin e saj në FIFA dhe UEFA. Ndeshja e nesërme është mesazhi i parë për këto shtëpi të futbollit”, deklaroi Terim.
Ish strategu i Galatasarayt u shpreh i lumtur që ndeshja e tij jubilare e 100-të në detyrë do të jetë pikërisht kundër Kosovës.
“Jam i lumtur që ndeshjen e 100-të do ta luaj me një vend mik si Kosova. Rezultati do të jetë në rend të dytë, do të jetë një takim vëllazëror”, theksoi ai.